डाटा सेभ गर्ने सामसुङका दुई स्मार्टफोन

जेष्ठ १३, २०७३- कोरियन स्मार्टफोन कम्पनी सामसुङले ५० प्रतिशतसम्म डाटा बचत गर्ने ग्यालेक्सी ‘जे फाइभ’ र ग्यालेक्सी ‘जे सेभेन’ नेपाली बजारमा भित्र्याएको छ । कम्पनीले परिस्कृत फिचरसहित दुई स्मार्टफोन बजारमा ल्याएको हो ।

गत वर्ष मात्रै बजारमा आएको ‘जे फाइभ’ र ‘जे सेभेन’ को मोडलमा फिचरहरु थपेर २०१६ भर्सन ल्याएको हो ।

दुबै स्मार्टफोनमा अल्ट्रा डाटा सेभिङ मोड राखिएको छ । जसले ५० प्रतिशतसम्म डाटा बचत गर्ने सामसुङ नेपालका नायव महाप्रबन्धक प्रणयरत्न स्थापितले दाबी गरेका छन् ।

यो फिचरले इन्टरनेट चलाउँदा साइट र फाइलहरु सानो बनाइदिन्छ भने अल्ट्रा डाटा सेभिङ मोडले ब्याक ग्राउन्डमा चलेका अन्य एपलाई बन्द गरिदिन्छ ।

जसले गर्दा तपाईंले आफूले चलाएको एपमा मात्रै डाटा खर्च हुन्छ । अहिलेका अधिकांश मोबाइलमा डाटा अन गर्ने वित्तिकै व्याकग्राउन्डका एपहरु पनि खुल्छन् ।

यी दुबै स्मार्टफोनमा ‘एस बाइक मोड’  पनि रहेको छ । यदि तपाइँले यो मोडमा राखेर बाइक चलाउँदै हुनुन्छ भने कल गर्ने व्यक्तिलाई बाइक चलाइरहेको संकेत दिन्छ । साथै, यदि जरुरी काम भएमा १ थिच्न भन्छ । ‘कलर’ले एक थिचेपछि मात्र बाइक चालकको मोबाइल बज्छ ।

'एस बाइक मोडमा चालकले बाइक रोकेर मात्र फोन उठाउन मिल्छ,' स्थापितले भने, 'यो फिचरले मोबाइलका कारण हुने सवारी दुर्घटना कम गर्ने विश्वास गरिएको छ ।'

यी फोनको अर्को विश्षता भनेको अल्ट्रापावर सेभिङ मोड पनि हो । यसले चार्ज सकिन लागेको मोबाइलको ब्याट्री लाइफ बढाउँछ र केही समय फोन अन राख्न सहयोग गर्छ ।

जे सेभेनमा ३३०० र जे फाइभमा ३१०० एमएएच क्षमताको ब्याट्री छ ।

Source:www.ekantipur.com