स्व. चन्द्रदेवलाल कौशिकलाई मरणोपरान्त स्वर्ण सम्मान

असार ६, २०७३- नेपाल स्काउटको ६४ औं स्थापना दिवस भव्यताका साथ सम्पन्न भएको छ । उक्त अवसरमा विभिन्न कार्यक्रमहरूको आयोजना गरियो । नेपाल स्काउटको केन्द्रीय कार्यालयमा झन्डोत्तोलनपश्चात् प्रभातफेरी हुँदै नेपाल प्रज्ञाप्रतिष्ठानमा आयोजित औपचारिक कार्यक्रमका साथ समापन भएको थियो ।  

औपचारिक कार्यक्रममा बोल्दै प्रमुख स्काउट युवा तथा खेलकुदमन्त्री सत्यनारायण मण्डलले स्काउट नामक सम्मानित संस्थाको मर्म र धर्म बुझेर यसको अर्थ र अस्तित्वलाई जोगाउँदै अघि बढ्नुपर्नेमा जोड दिए ।

नेपाल स्काउटलाई संस्थागत गर्न तथा स्काउट ऐन ल्याउन सफल स्व. चन्द्रदेवलाल कौशिकलाई ५० वर्ष सेवा गरेबापत स्वर्ण सेवा सम्मान (मरणोपरान्त) द्वारा सम्मानित गरियो । स्काउटका चिफ कमिस्नर रविन दाहालको हातबाट सम्मान ग्रहण गर्दै स्व. चन्द्रदेवलाल कौशिकका छोरा चन्दन कौशिकले स्काउटिङको पवित्रता र स्वच्छतामुखी सिद्धान्तलाई कायम राख्न स्काउटिङमा थप सेवा गर्ने ऊर्जा मिलेको बताए ।

तत्कालीन समयमा राजाको हुकुमका आधारमा चलेको स्काउट नामक सानो अभियानलाई स्व. कौशिकले संस्थागत गर्नका निम्ति निक्कै ठूलो त्याग र बलिदान दिएका थिए ।

फलस्वरूप यसमा उनी सफल पनि भएका थिए । संस्थाको कुनै आधिकारिक कागजात र बैधानिकता नभएका बखत वि.सं. २०१२ सालतिर स्काउट प्रवेश गरेका स्व. कौशिकले १२ वर्षसम्म नेपाल स्काउटको राष्ट्रिय सचिव तथा सह–प्रमुख आयुक्तको कार्यभार सम्हालेका थिए ।

सन् १९४२ मा सिरहामा जन्मिएका स्व. चन्द्रदेवलाल कौशिकले धनुषाको यदुकुहा बिद्यालयबाट शिक्षण पेशा शुरु गरी जनकपुरको सरस्वती मा.वि. मा लामो समय अध्यापन पेशामा आबद्ध भएका थिए ।

बि.सं. २०५१ सालमा स्काउट ऐन आउनु अघि काठमाण्डौं उपत्याका भित्रका बाहेक कुनैपनि ब्यक्ति कार्यसमितिमा आउन नपाउने प्राबधानलाइ परिवर्तन गर्दै कौशिकले ऐनमा नै प्रजातान्त्रिक प्रकृया अनुसार सबै क्षेत्र र तहका मानिसको प्रतिनिधित्व हुने ब्यवश्था कायम गराएका थिए ।

अनुशासनको पाठशाला स्काउट ले अनुशासित बनाउन तथा चरित्र निर्माण गर्न बालबालिका र युवा लक्षित स्काउटिङ विधि अनुसारका कृयाकलाप गराउने गर्दछ ।

बि.सं. २०६९ मा सहादत प्राप्त गरेका चन्द्रदेवलाल कौशिकले उपत्याका बाहिर धनुषा जील्लाको नेतृत्व गर्दै मुख्यालय कै दांजोमा स्काउटको भौतिक संरचना जोड्न सफल भएका थिए । स्काउटका जन्मदाता बेलायती नागरिक बेरेन पावेलले लेखेको स्काउटिङ फर ब्वाइज पुस्तकलाई नेपालीमा अनुवाद गर्न सफल कौशिक नेपाल स्काउटलाइ मुर्त रुप दिने ब्यक्तित्व हुन् । हालसम्म पनि सोही पुस्तकलाइ आधार स्काउटिङका कृयाकलाप सिकाइन्छ ।

अनुशासन र दृढताको अर्को नामका रूपमा चिनिने स्काउटमा हाल मुलुकभर रहेका ६० हजार स्काउटियनमध्ये २० हजारभन्दा बढी महिलाको संख्या छ ।

कार्यक्रममा युवा तथा खेलकुदमन्त्रीका अलावा प्रमुख आयुक्त रविन दाहाल, एसिया प्रशान्त क्षेत्रीय स्काउट एवार्ड कमिटीका श्रीराम लामिछाने आदिले मन्तव्य व्यक्त गरेका थिए ।

Source:www.ekantipur.com