असार १५, २०७३- कृषि विकास मन्त्रालयले यस वर्षको सर्वोत्कृष्ट कृषक लाहाचोक–५ कास्कीका इमानबहादुर गुरुङलाई छनौट गर्दै २ लाख नगदसहित राष्ट्रपति उत्कृष्ट कृषक पुरस्कार प्रदान गरेको छ ।
कृषि क्षेत्रकै सबैभन्दा ठुलो राशीको पुरस्कार पाउने गुरुङ दोस्रो किसान हुन् । गत वर्षदेखि सुरु भएको यो पुरस्कार प्राप्त गर्ने कैलाली टिकापुरका कालु हमाल पहिलो किसान हुन् । ४९ वर्षीय गुरुङलाई कृषि विकास मन्त्री हरिबोल गजुरेल र पशुविकास मन्त्री शान्ता मानवीले खुमलटारस्थित नार्क परिसरमा संयुक्त रुपमा पुरस्कार हस्तान्तरण गरेका थिए ।
करिब ६ करोड लगानीमा भंैसीपालन गर्दै पोखरामा दुध बिक्रि गरीरहेका गुरुङले गत वर्ष मात्रै १ करोड ६२ लाख रुपैयाँ बराबरको दुधको कारोबार गरेका थिए । ३७ जनालाई रोजगारी पनि दिँदै आएका उनीसँग हाल ३ सय हाराहारी भैंसी छन् । ‘२०६७ सालमा ३ वटा भैंसीबाट व्यवसाय सुरु गरेको यतिबेला ३ सय बढी भंैसी छन्,’ पुरस्कार प्राप्त गरेपछी उनले भने ।
यसैबीच मन्त्रालयले एक लाख रुपैयाँ राशी रहेका चार उत्कृष्ट पुरस्कार पनि वितरण गरेको छ । यो पुरस्कार पाउनेमा मध्यक्षेत्रबाट डढुवा रामेछापका रङ्गदान तामाङ्ग, पूर्वाञ्चलबाट सितासताक्षी, झापाकी देवीकुमारी ओली, मध्यपश्चिमाञ्चलको बर्दिया राजापुरका शर्मा चौधरी र सुदुरपश्चिमको टिकापुर कैलालीका विनोद कुमार शाह छन् । पश्चिमाञ्चलबाट छनौटमा परेका गुरुङको पशुपालन अरु चारभन्दा सर्वोत्कृष्ट तामाङ्ग एकिकृत कृषि, ओली मौरीपालन, चौधरी खाद्यन्न बिउ र शाह केरा खेतीका किसान हुन् ।
देशभर रहेका जिल्ला कृषि विकास कार्यालयले क्षेत्रिय कार्यालयलाई अनि क्षेत्रियले कृषि विभाग हुँदै मन्त्रालयलाई सिफारिस गरेको आधारमा यी किसान छनौटमा परेका हुन् । मन्त्रालयका सहायक प्रवक्ता शंकर सापकोटाका अनुसार, कृषि पेशमा संलग्न युवा तथा अर्ध व्यवसायिक कृषकहरुलाई प्रोत्साहन गर्न विदेशिने र विदेशमा रहेकालाई मुलुकमै आर्कषित गर्ने पुरस्कारको लक्ष्य रहेको छ ।
Source:www.ekantipur.com
Post a Comment