जेष्ठ २४, २०७३- श्रम तथा रोजगार मन्त्रालयले अन्तर्गतका निकायहरुलाई आफ्ना वेबसाइट अपडेट गर्न सोमवार लिखित निर्देशन दिएको छ । वेवसाईट अपडेट नभएकोबारे कान्तिपुरको अनलाईन संस्करण र कान्तिपुर दैनिकमा समाचार प्रकाशित भएपछि मन्त्रालयले निर्देशन दिएको हो ।
मन्त्रालयका सहायक प्रवक्ता शिवराज सेढाईंले मातहतका सबै निकायलाई वेबसाइटहरु नियमति अपडेट गर्न निर्देशन दिएको बताए । 'वेबसाइट नियमित अद्याबधिक गर्नु भनेर सबै निकायलाई निर्देशन दिईसकेका छौं' उनले भने, 'कान्तिपुरमा समाचार प्रशाशित भए लगत्तै मौखिक र सोमवार लिखित निर्देशन गरेका हौं ।'
देश-विदेशमा रहेका कामदार र सरोकार निकायलाई अद्याबधिक जानकारी दिईरहनु पर्ने मन्त्रालय मातहतका वेबसाईटहरुको हालत बिजोग भएको समाचार शनिवार प्रकाशित भएको थियो ।
अनलाईनमा शनिवार अपरान्ह समाचार प्रकाशित भएकै राती विभागले एक सातादेखि नफेरेको महानिर्देशको नाम फेरेर शत्रुघ्नप्रसाद पुडासैनीको राखेको थियो । विभागले चैत्र महिना देखि अपडेट नगरेको मासिक प्रगति विवरणमध्ये आईतवार वैशाख महिनाको राखेको छ ।
साता अघि सेवा निवृत भईसकेका कार्यकारी प्रमुखको नाम हटाएर 'सामाजिक सुरक्षा कोष' ले आईतवार नयाँ कार्यकारी निर्देशक अनिल गुरुङ सहित शाखा अधिकृत, नासु, कम्प्युटर अपरेटहरुको नाम सच्याएको थियो ।
श्रम तथा रोजगार मन्त्रालयले 'संबन्धित निकाय' भनेर वेवसाइटमा राखेको लिङ्कबाट भित्र पस्दा पुगिने 'बैदेशिक रोजगार न्यायाधिकरण' र 'व्यवसायजन्य सुरक्षा तथा स्वास्थ्य संबन्धी आयोजना'को वेवसाईट खुल्दैन । न्यायाधिकरणको वेवसाईट खोल्दा 'ब्याक टु होम पेज' र आयोजनाको लिंङ्क क्लिक गर्दा 'सरी' भनेर देखाउँछ । श्रम मन्त्रालय स्वयंले भने वैशाख १७ गते उद्घाटन गरेको द्रुत सुनुवाई समूह -स्यापिट रेस्पेन्स टीम) बारे वेवसाईटमा कुनै जानकारी राखेको छैन ।
'व्यवसायिक तथा विकास तालिम केन्द्र', भैसेपाटी, ललितपुरको बेवसाईटमा 'रिसेन्ट एक्टिभिटी ताजा गतिविधी)' भनेर २०७१ सालको छ, त्योएक्टिभीटी पनि खुल्दैन । उसले केन्द्रको परिचय र दृष्टिकोण खण्डमा कुनै सामाग्री राखेको छैन । श्रम विभागको वेवसाईटका कभर पेजमा फोटोहरु दुई वर्षदेखि उस्तै छन् । नयाँ थपिएका छैनन् ।
Source:www.ekantipur.com
Post a Comment