मुगुकाे मुन्दुमा केही छैन एसएलसी पास

असार ७, २०७३- पिना गाविसको मुन्दु गाउँमा अहिलेसम्म एक जनाले पनि एसएलसी उत्तीर्ण गर्न सकेका छैनन् । 

करिब ५३ घरधुरी रहेको गाउँ एसएलसीविहीन छ । गाउँमा प्राथमिक विद्यालय छ । कक्षा ५ देखि माथि पढ्न चार घण्टा हिँडेर टोप्ला नामक गाउँ पुग्नुपर्छ । टाढा भएकाले प्राथमिक तहमै पढाइ छाड्ने गरेका छन् । 

यस गाउँबाट अहिलेसम्म १२ जनाले एसएलसी दिएका छन् । उत्तीर्ण भने कसैले गर्न सकेका छैनन् । गाउँमा लेखापढी गर्नु परे छिमेकी गाउँ कोटीलाबाट मान्छे खोजेर ल्याउनुपर्छ । 

‘लाजमर्दो अवस्था छ, यत्रो गाउँमा अहिलेसम्म एक जनाले पनि एसएलसी पास गरेका छैनन्,’ ६० वर्षीय सिहरूप बोहराले भने, ‘चिठीपत्र, तमसुक हेर्ने र लेख्न मान्छे छैनन् ।’

युवा जति पढाइ छाडेर खेतीपाती र भेडापालनमा लागेका छन् । गाविसका समाजसेवी हरिचन्द शाहीले भने, ‘पढाइलेखाइ छैन, स्वास्थ्यको स्थिति राम्रो छैन । राज्यको सेवा सुविधा पनि पुगेको छैन ।’

Source:www.ekantipur.com