असार १८, २०७३- बंगलादेशको राजधानी ढाकास्थित एक क्याफेमा इस्लामिक स्टेट (आईएस) ले आतंककारी हमला गरी २० जनाको हत्या गरेको छ । मृतक सबै विदेशी नागरिक भएको सेनाको भनाइ छ ।
बन्दुकधारीले शुक्रबार बेलुकी होली आर्टिसन बेकरी क्याफेमा हमला गरी त्यहाँ रहेका मानिसलाई बन्धक बनाएर धारिलो हतियार प्रयोग गरी हत्या गरेका हुन् ।
एक सरकारी अधिकारीका अनुसार आक्रमणकारीमध्ये ६ जना मारिएका छन् । एक पक्राउ परेका छन् । इस्लामिक स्टेट (आईएस) ले घटनाको जिम्मा लिएको छ ।
त्यतिखेर खास गरी गार्मेन्ट उद्योग क्षेत्रमा कार्यरत मानिस क्याफेमा खाना खाइरहेका थिए । मानिसहरूले रमादानको व्रत तोड्ने तर्खर गरिरहेका बेला आतंककारीले क्याफे कब्जा गरेका हुन् । ‘यो एउटा अत्यन्त आततायी घटना हो,’ प्रधानमन्त्री शेख हसिना बाजेदले भनिन्, ‘यी कस्ता मुस्लिम होलान् ? यिनको कुनै धर्म नै छैन । मेरो सरकार बंगलादेशबाट आतंकवाद र हतियारबद्ध विद्रोह नामेट गर्न प्रतिबद्ध छ ।’
बंगलादेशको डेली स्टार समाचारपत्रका अनुसार बन्दुकधारीले कुरान पढ्न नजान्ने जोकोहीलाई यातना दिएका थिए । उनीहरूले बंगलादेशी बन्धकलाई चाहिँ खानासमेत दिएका थिए । क्याफेका सुपरभाइजर सुमोन रेजा गुल्सन आक्रमण सुरु हुँदा त्यहीं थिए तर उनी छानाबाट निस्केर भाग्न भ्याए । ‘विस्फोट हुन थालेपछि पूरै भवन पो हल्लियो, मचाहिँ छानाबाट हामफालेर कुदिहाले,’ उनले भने । क्याफेकी छिमेकी रसिला रहिमका अनुसार ८ बजेतिर गोलीका आवाज सुनिएका हुन् ।
कम्तीमा ९ जना हतियारधारी छिरेर क्याफमा गोली प्रहार गर्न थालेका हुन् । उनीहरू ‘अल्लाह अकबर’ भन्दै छिरेका थिए । उनीहरूसँगको भिडन्तमा कम्तीमा २ प्रहरी मारिएका छन् । ३० जना घाइते भएका छन् ।
सुरक्षित मानिएको क्षेत्रमा रहेको क्याफेमा हमला गरेर सन्देश दिन खोजिएको देखिन्छ । मुस्लिम धार्मिक पर्व इद अल फिद्रको अन्तिम सप्ताहान्तमा यो घटना भएको हो । यो क्याफे विदेश र मध्यमवर्गीय बंगलादेशीमाझ लोकप्रिय छ । ढाकाको गुल्सन जिल्ला अत्यन्त सुुरक्षित क्षेत्र मानिन्छ । थुप्रै देशका दूतावास र गैरसरकारी अन्तर्राष्ट्रिय संस्थाका कार्यालय यहाँ छन् । बंगलादेशका पनि अत्यन्त धनी मात्र त्यहाँ बस्छन । गत वर्ष संकित आतंककारीबाट एक इटालियाली सहायता कार्यकर्ता मारिएपछि सरकारले सुरक्षा व्यवस्था कडा पारेको थियो । सेक्युरिटी चेक पोस्ट पार नगरिकन गुल्सन जिल्लामा प्रवेश गर्न गाह्रो छ । पछिल्ला ३ वर्षमा बंगलादेशमा अतिवादीद्वारा ४० जना मारिएका छन्, जसमा बढीजसो धर्मनिरपेक्षताको पक्षमा बहस गर्ने ब्लगर, लेखक, अधिकारकर्मी, प्राज्ञ र धार्मिक अल्पसंख्यक छन् । होली आर्टिसन क्याफेमा भएको आक्रमण निकै योजनाबद्ध देखिन्छ ।
आईएसको तथाकथित इमाक समाचार एजेन्सीले विभिन्न मुलुकका २० जनाभन्दा बढी मारिएको जनाएको छ ।
सेनाका लेफटिनेन्ट कर्नेल टुफिन मसुदका अनुसार वार्ताका लागि गरिएको प्रस्ताव बन्दुकधारीले स्वीकार गरेनन् । घटनाको १२ घण्टापछि मात्र सुरक्षाकर्मी भित्र छिर्न सकेका थिए ।
सेनाले मृतक सबै विदेश हुन भने पनि अपुष्ट समाचारमा कम्तीमा एक बंगलादेशीसमेत परेको दाबी छ । भारतीय विदेश मन्त्रालयले एक भारतीय युवती पनि आक्रमणमा मारिएको जनाएको छ । बंगलादेशी सेनाका ब्रिगेडियर जनरल नाइम असरफ चौधरीका अनुसार आतंककारीले धारिलो हतियार प्रयोग गरी आततायी आक्रमण गरेका हुन् ।
इटालीका प्रधानमन्त्री माटियो रेन्जीले आफ्ना नागरिकहरू परेको जनाएका छन् । उनले पीडित परिवारलाई समवेदना व्यक्त गरेका छन् । इटालियाली समाचार एजेन्सी अन्साका अनुसार १० जनासम्म इटालियाली नागरिक अहिलेसम्म सम्पर्कविहीन अवस्थामा छन् ।
Source:www.ekantipur.com
Post a Comment